Editoryal : Chanje Imaj Ayiti sou Entènèt
Entènèt, yon kote tout moun ka eksprime tèt yo ak pataje enfòmasyon, gen yon gwo wòl nan fason mond lan wè peyi yo. Men, pou Ayiti, imaj sa yo souvan defome. Yo montre sèlman vye foto: dezas natirèl, povrete grav, ak enstabilite. Malgre foto sa yo ka reflete kèk reyalite, yo pa montre bèl bagay k ap fèt nan peyi a kounye. Se pou sa li enpòtan pou nou travay ansanm pou chanje fason Ayiti prezante sou Entènèt la epi kreye yon imaj ki balanse epi ki modèn.
Ansyen foto sa yo ki sou Entènèt la kreye gwo pwoblèm. Yo bay yon vizyon ki pa klè sou Ayiti epi fè moun lòt peyi panse Ayiti se yon peyi san espwa. Sa ka anpeche touris vini, dekouraje envestisè etranje, e menm fè Ayisyen pèdi fyète nan peyi yo. Sa fè Ayiti parèt tankou yon peyi ki toujou nan kriz, pandan anpil bagay pozitif ap fèt ki pa janm parèt devan je mond lan.
Yon lòt bagay ki enpòtan se sonje ke Ayiti, se pa sèlman kapital li, Pòtoprens. Peyi a gen anpil lòt zòn ki rich nan kilti, istwa, ak bèl bagay natirèl. Soti nan bèl plaj yo nan Sid, rive nan mòn vèt yo nan Nò, oswa vil tankou Jakmèl, Kap Ayisyen, ak Jeremi, Ayiti gen anpil potansyèl ki merite pou moun wè yo.
Nou dwe mete tout efò nou ansanm pou fè imaj sa yo chanje. Se pa yon travay fasil, men li posib ak bon estrateji.
Yon Plan pou Chanje Istwa a
- Kreye epi Pataje Yon Nouvo Imaj Pozitif pou Ayiti
- Pwodui kontni pozitif: Moun dwe wè tout sa ki ap bon nan Ayiti tankou pwojè k ap ede kominote yo, antreprenè k ap inove, ak bèl tradisyon yo.
- Promosyon patrimwàn nou: Ayiti se yon peyi ki gen yon richès kilti ak istwa ki pa gen parèy. Nou bezwen mete yo an valè.
- Mete aksan sou tout peyi a: Pa sèlman montre Pòtoprens, men bay espas pou lòt zòn yo ki gen anpil bèl bagay pou ofri
- Amelyore Prezans sou Entènèt
- Optimize rezilta rechèch yo (SEO): Nou dwe ranpli Entènèt ak kontni ki modèn ak pozitif pou ranplase kontni ki fin vye yo.
- Itilize rezo sosyal: Pataje foto ak videyo ki montre bèl bagay nan Ayiti sou Instagram, TikTok, YouTube, ak Facebook.
3. Mete aktè kle yo ansanm
• Diaspora Ayisyen an: Diaspora a gen fòs ak enpak sou Entènèt. Yo ka ede pataje yon vizyon pozitif pou Ayiti.
• Jounalis ak kreyatè kontni: Yo dwe angaje yo pou kreye istwa ki montre lòt bò Ayiti.
• Kolaborasyon ak gwo platfòm: Travay ansanm ak Google, Facebook, ak YouTube pou retire kontni ki fin vye epi mete sa ki pi aktuel yo devan.
Yon Responsablite Kolektif pou Avni Ayiti
Chanje imaj Ayiti sou Entènèt se pa sèlman efase vye foto, men bati yon memwa dijital ki montre Ayiti jan li ye jodi a. Sa mande patisipasyon gouvènman an, sektè prive a, ONG yo, ak chak Ayisyen ki vle wè peyi a avanse.
01TekTek kwè teknoloji ka sèvi kòm yon zouti pou chanje fason moun wè Ayiti. Nou envite tout moun mete men pou travay sou yon nouvo istwa dijital pou peyi a. Ansanm, nou ka bati yon Ayiti ki wè tankou yon peyi kouraj, kreyativite, ak potansyèl san limit. Epi, yon Ayiti kote tout zòn, pa sèlman kapital la, gen valè yo rekonèt nan devlopman nasyonal la.
